దసరా నవరాత్రి ఉత్సవాల్లో భాగంగా లక్ష్మణచందాలోని అష్టభుజ వేణుగోపాలస్వామి రథయాత్ర వైభవంగా కొనసాగుతోంది. ఉత్సవాల్లో ఏడవ రోజున, హనుమంత వాహనంపై స్వామివారిని ప్రత్యేకంగా అలంకరించి గ్రామ వీధుల్లో ఊరేగించారు.
మహిళలు హారతులతో స్వామివారికి స్వాగతం పలికారు. గ్రామస్థులు కోలాటాలు ఆడుతూ, భక్తిగీతాలు ఆలపిస్తూ ఉత్సవాల్లో ఉత్సాహంగా పాల్గొన్నారు. స్వామివారి దర్శనం కోసం లక్ష్మణచందా తో పాటు పొరుగు గ్రామాల నుంచి కూడా భక్తులు అధిక సంఖ్యలో తరలివచ్చారు. రథయాత్ర సందర్భంగా ఆలయ పరిసరాలు భక్తిశ్రద్ధలతో నిండిపోయాయి.
