పరిశ్రమలకు నిరంతర విద్యుత్.. రైతులకు కోతలు ఎందుకు పాలమూరు విష్ణువర్ధన్రెడ్డి ప్రశ్న

ఒకవైపు పెట్టుబడుల భారం, మరోవైపు ప్రకృతి వైపరీత్యాలు, ఇంకోవైపు విద్యుత్ కోతలు రైతులను తీవ్ర ఆందోళనకు గురిచేస్తున్నాయి. షాద్నగర్ నియోజకవర్గంలోని మండలం నర్సప్పగూడ గ్రామంలో రైతులు ఎదుర్కొంటున్న సమస్యలను బీజేపీ రాష్ట్ర నాయకులు పాలమూరు విష్ణువర్ధన్రెడ్డి స్థానికంగా పర్యటించి తెలుసుకున్నారు. గత వర్షాకాలంలో మొక్కజొన్న, పత్తి పంటలు దెబ్బతిని తీవ్రంగా నష్టపోయామని, ప్రస్తుతం విద్యుత్ కోతల కారణంగా వరి పంటలు సైతం ఎండిపోయే ప్రమాదం ఏర్పడిందని రైతులు ఆయనకు తమ గోడును వెళ్లబోసుకున్నారు. పంటల సాగు కోసం చేసిన పెట్టుబడులు కూడా తిరిగి వచ్చే పరిస్థితి లేదని ఆవేదన వ్యక్తం చేశారు.

రైతుల సమస్యలను తెలుసుకున్న పాలమూరు విష్ణువర్ధన్రెడ్డి విద్యుత్ అధికారులతో మాట్లాడి సమస్యను తక్షణమే పరిష్కరించాలని కోరారు. వ్యవసాయానికి అవసరమైన విద్యుత్ను సక్రమంగా సరఫరా చేసి పంటలు ఎండిపోకుండా చర్యలు తీసుకోవాలని ఆయన డిమాండ్ చేశారు. రైతులు అప్పులు చేసి పంటలు సాగు చేస్తే, కీలకమైన సమయంలో విద్యుత్ సరఫరాలో అంతరాయాలు ఏర్పడటం వారి ఆర్థిక పరిస్థితిని మరింత దిగజార్చే ప్రమాదం ఉందని ఆయన పేర్కొన్నారు. పరిశ్రమల ఉత్పత్తి ఎంత ముఖ్యమో, రైతుల పంటలూ అంతే ముఖ్యం. పరిశ్రమలకు విద్యుత్ సరఫరా కొనసాగుతున్నప్పుడు వ్యవసాయ రంగానికి కూడా తగిన ప్రాధాన్యం ఇచ్చి, రైతులకు నిరంతరాయంగా నాణ్యమైన విద్యుత్ అందించాల్సిన బాధ్యత ప్రభుత్వంపై ఉందని ఆయన ప్రస్తావించారు.

రైతుల పంటలు చేతికొచ్చే కీలక సమయంలో విద్యుత్ సమస్యలు తలెత్తకుండా అధికారులు ముందస్తు చర్యలు చేపట్టాలని ఆయన కోరారు. షాద్నగర్ ఎమ్మెల్యే వీర్లపల్లి శంకర్ కూడా ఈ సమస్యపై స్పందించి, విద్యుత్ సరఫరా పరిస్థితిని సమీక్షించి రైతుల పంటలను కాపాడేందుకు చర్యలు తీసుకోవాలని విజ్ఞప్తి చేశారు. అన్నదాతకు భరోసా ఇవ్వాల్సిన సమయంలో విద్యుత్ కోతలు మరింత భారంగా మారుతున్నాయని, రైతుల సమస్యను ప్రభుత్వం అత్యవసరంగా పరిగణించి పరిష్కరించాలని స్థానిక రైతులు కోరుతున్నారు. ఈ కార్యక్రమంలో మండల అధ్యక్షులు వడ్ల అరవింద్ చారి, కోడిచర్ల శ్రీనివాస్, ఉపసర్పంచ్ అప్పల సిద్ధయ్య, ఎంకిరాల నరసింహ గౌడ్, బి. లక్ష్మణ్ గౌడ్, నక్కల అశోక్, బి. వెంకటేష్, నీరటి మహేందర్, మంగలి లక్ష్మణ్, అంజయ్య, రాములు, లింగం, బాలరాజ్, శ్రీశైలం, కృష్ణమోహన్ గుప్తా, జంగయ్య, లక్ష్మయ్య తదితరులతో పాటు స్థానిక రైతులు పాల్గొన్నారు.