ఉమ్మడి మహబూబ్నగర్ జిల్లాలో ఏళ్ల తరబడి పెండింగ్లో ఉన్న సాగునీటి ప్రాజెక్టులను త్వరితగతిన పూర్తి చేయాలని డిమాండ్ చేస్తూ, షాద్నగర్లో పండుగ సాయన్న స్ఫూర్తితో లక్ష సంతకాల మహోద్యమం కార్యక్రమం ఉత్సాహంగా కొనసాగింది. ఈ కార్యక్రమానికి షాద్నగర్ ఎమ్మెల్యే వీర్లపల్లి శంకర్ మద్దతు తెలిపారు. ప్రజలు, నాయకులు, మీడియా ప్రతినిధులు పెద్ద సంఖ్యలో పాల్గొని సంతకాలు చేశారు.
ఉమ్మడి మహబూబ్నగర్ జిల్లాలో ఏళ్ల తరబడి పెండింగ్లో ఉన్న సాగునీటి ప్రాజెక్టులను త్వరితగతిన పూర్తి చేసి రైతాంగానికి న్యాయం చేయాలని డిమాండ్ చేస్తూ, ఉమ్మడి మహబూబ్నగర్ పెండింగ్ ప్రాజెక్టుల సాధన జేఏసీ ఆధ్వర్యంలో చేపట్టిన పండుగ సాయన్న స్ఫూర్తితో లక్ష సంతకాల మహోద్యమం కార్యక్రమం షాద్నగర్లో ఉత్సాహంగా కొనసాగింది. గురువారం షాద్నగర్ ఎమ్మెల్యే క్యాంపు కార్యాలయం ఎదుట సంతకాల సేకరణ కార్యక్రమాన్ని నిర్వహించారు. ఈ సందర్భంగా షాద్నగర్ ఎమ్మెల్యే వీర్లపల్లి శంకర్ సంతకం చేసి, సంతకాల మహోద్యమానికి తన మద్దతు తెలిపారు. రైతాంగ ప్రయోజనాల కోసం చేపట్టిన ఈ కార్యక్రమంలో ప్రజలు పెద్ద ఎత్తున భాగస్వాములు కావాలని నిర్వాహకులు కోరారు. ఎమ్మెల్యే వీర్లపల్లి శంకర్తో పాటు జర్నలిస్టు కేపీ, శరత్ తదితరులు సంతకాలు చేశారు. ముదిరాజ్ నేతలు అందె బాబయ్య, అందె మోహన్, అంచె రాములు తదితరులతో పాటు వివిధ వర్గాల నాయకులు, ప్రజలు పెద్ద సంఖ్యలో పాల్గొని సంతకాలు చేశారు. ఉమ్మడి మహబూబ్నగర్ జిల్లాలో నిలిచిపోయిన సాగునీటి ప్రాజెక్టులను పూర్తి చేయడం, పి.ఆర్.ఎల్.ఐ. పథకాన్ని త్వరితగతిన పూర్తిచేసి మహబూబ్నగర్, రంగారెడ్డి జిల్లాల రైతాంగానికి సాగునీరు అందించడం, నిర్వాసితులకు పునరావాసం మరియు పునరావాస ప్యాకేజీలను సక్రమంగా అమలు చేయడం, పాత సాగునీటి ప్రాజెక్టులను పూర్తి ఆయకట్టుకు నీరందించేలా చర్యలు చేపట్టడం వంటి అంశాలను జేఏసీ ప్రధానంగా ప్రస్తావించింది.
అలాగే, డిండి లిఫ్ట్ పనుల విషయంలో ఉమ్మడి మహబూబ్నగర్, రంగారెడ్డి జిల్లాల రైతాంగ ప్రయోజనాలను కాపాడాలని, కృష్ణా జలాల పంపకాల్లో తెలంగాణ జిల్లాల మధ్య పారదర్శకత పాటించాలని జేఏసీ డిమాండ్ చేసింది. కల్వకుర్తి ఎత్తిపోతల పథకంలో భాగంగా చంద్రసాగర్అప్పారావుపేట్ లిఫ్ట్ ఏర్పాటు, మండల రైతాంగానికి సాగునీటి సౌకర్యం, వెల్లూరుగొందిమళ్ల బ్యారేజీ నిర్మాణం వంటి డిమాండ్లను ప్రభుత్వం పరిశీలించి న్యాయం చేయాలని కోరింది. లక్ష సంతకాల సేకరణ కార్యక్రమం నిర్దేశిత గడువు వరకు కొనసాగుతుందని నిర్వాహకులు తెలిపారు. సేకరించిన లక్ష సంతకాలతో కూడిన వినతిపత్రాన్ని రాష్ట్ర ముఖ్యమంత్రికి అందజేసి, పెండింగ్ సాగునీటి ప్రాజెక్టుల సమస్యలకు పరిష్కారం చూపాలని కోరనున్నట్లు వెల్లడించారు. ఈ సందర్భంగా పెండింగ్ ప్రాజెక్టుల సాధన సమితి రంగారెడ్డి జిల్లా చైర్మన్ సత్యనారాయణ, కర్ణకోట రవీంద్రనాథ్, మందారం నరసింహులు, బుద్ధుల జంగయ్య తదితరులు మాట్లాడుతూ, రైతాంగ ప్రయోజనాలను దృష్టిలో ఉంచుకొని పెండింగ్ ప్రాజెక్టులను పూర్తి చేయాలని కోరారు. ప్రజల నుంచి వస్తున్న సంతకాలు ఉద్యమానికి మరింత బలాన్ని చేకూరుస్తున్నాయని, ప్రభుత్వం స్పందించి న్యాయమైన డిమాండ్లను నెరవేర్చాలని డిమాండ్ చేశారు.
