రైతులు, ప్రజలకు ఇబ్బందులు కలగకుండా ధాన్యం కొనుగోళ్లు, విక్రయాలు చేపట్టాలని నిజామాబాద్ పోలీస్ కమిషనర్ పి. సాయి చైతన్య సూచించారు. ధాన్యం నిల్వలు, రవాణా, విక్రయాల విషయంలో ప్రభుత్వ నిబంధనలను తప్పనిసరిగా పాటించాలని రైస్ మిల్లర్లకు స్పష్టం చేశారు. కృత్రిమ కొరత సృష్టిస్తే సహించేది లేదని ఆయన హెచ్చరించారు.
నిజామాబాద్ పోలీస్ శాఖ ఆధ్వర్యంలో శుక్రవారం రైస్ మిల్లుల సంఘాల ప్రతినిధులు, మిల్లర్లతో నిర్వహించిన సమీక్షా సమావేశంలో పోలీస్ కమిషనర్ పి. సాయి చైతన్య మాట్లాడారు. జిల్లాలో ప్రస్తుత వ్యవసాయ పరిస్థితులు, ధాన్యం దిగుబడులు, కొనుగోళ్లు, విక్రయాలు, ప్రజలకు సరసమైన ధరలకు బియ్యం అందుబాటులో ఉంచేందుకు తీసుకోవాల్సిన చర్యలపై ఈ సందర్భంగా చర్చించారు. ఎల్నినో ప్రభావంతో వాతావరణ పరిస్థితుల్లో మార్పులు చోటుచేసుకుంటున్న నేపథ్యంలో పంటల సాగు, దిగుబడులపై ప్రతికూల ప్రభావం పడే అవకాశాలను దృష్టిలో ఉంచుకుని ధాన్యం కొనుగోళ్లు, విక్రయాల్లో బాధ్యతాయుతంగా వ్యవహరించాలని కమిషనర్ సూచించారు. రైతుల నుంచి కొనుగోలు చేసిన ధాన్యాన్ని అధిక ధరలకు ఇతర ప్రాంతాలకు తరలించి విక్రయించడం, కృత్రిమ కొరత సృష్టించడం వంటి చర్యలకు పాల్పడవద్దని ఆయన తెలిపారు.
ప్రభుత్వ నిబంధనలు, అనుమతులు, ధరల మార్గదర్శకాలకు అనుగుణంగా కొనుగోళ్లు, విక్రయాలు చేపట్టాలని ఆయన సూచించారు. ప్రజలకు అవసరమైన బియ్యం అందుబాటులో ఉండేలా చూడటంతో పాటు ధరల భారం సామాన్యులపై పడకుండా సహకరించాలని కోరారు. రైతుల కష్టాన్ని గుర్తించి వారి ప్రయోజనాలకు ప్రాధాన్యం ఇవ్వాలని, వినియోగదారులకు సరసమైన ధరలకు బియ్యం లభించేలా రైస్ మిల్లర్లు, సంఘాల ప్రతినిధులు సమన్వయంతో పనిచేయాలని పేర్కొన్నారు. ధాన్యం కొనుగోళ్లు, నిల్వలు, రవాణా, విక్రయాల్లో సంబంధిత ప్రభుత్వ శాఖల నిబంధనలు పాటించాలని స్పష్టం చేశారు.
ధాన్యం, బియ్యం సరఫరాలో ఎలాంటి ఇబ్బందులు తలెత్తకుండా ప్రతి ఒక్కరూ సామాజిక బాధ్యతతో వ్యవహరించాలని పోలీస్ కమిషనర్ పి. సాయి చైతన్య పిలుపునిచ్చారు. ఈ సమావేశంలో అదనపు డీసీపీ (పరిపాలన) ఎన్. శుభం ప్రకాష్, జిల్లా పౌరసరఫరాల అధికారి ఎం. శ్రీకాంత్ రెడ్డి, జిల్లా పౌరసరఫరాల సంస్థ మేనేజర్ బి. ప్రవీణ్, నిజామాబాద్ ఏసీపీ ప్రకాష్, ప్రత్యేక విభాగం ఇన్స్పెక్టర్ మల్లేశం, జిల్లా రైస్ మిల్లుల సంఘం కార్యదర్శి మోహన్ రెడ్డి, రైస్ మిల్లర్లు, పౌరసరఫరాల శాఖ ఉప తహసీల్దార్లు తదితరులు పాల్గొన్నారు.
