టేకు కర్రలో వెలసిన దుర్గామాత..

టేకు కర్రలో అమ్మవారి ఉనికి

2012లో గ్రామానికి చెందిన అల్లూరి తులసిరాం గృహ నిర్మాణం కోసం టేకుతో ఇంటి సామగ్రిని తయారు చేసేందుకు కర్రలను తీసుకొచ్చినట్లు గ్రామస్థులు తెలిపారు. ఆ సమయంలో ఓ టేకు కర్ర నుంచి అమ్మవారి శబ్దం, గుడి గంటల తరహా ధ్వని వినిపించడంతో ఆ కర్రను సాధారణ కర్రగా కాకుండా దైవస్వరూపంగా భావించినట్లు పేర్కొన్నారు.

ఆ టేకు అఖండ కర్రను కు చెందిన కళాకారులు పార్వతవార్ శ్యామ్సాయి, తండ్రి శంకర్ వద్దకు తీసుకెళ్లారు. అనంతరం శాస్త్రోక్త నియమాలు, నిష్ఠలతో దుర్గామాత రూపాన్ని రూపొందించారు.

కల్లూరు ప్రాంతానికి చెందిన వేద పండితుడు ప్రకాష్ ఆధ్వర్యంలో నామకరణం చేసి శ్రీశ్రీశ్రీ మహాప్రసన్న జగత్ జనని జగదీశ్వరి దేవి సత్య కర్ర దుర్గామాతగా ప్రతిష్ఠించినట్లు గ్రామస్థులు తెలిపారు.

13 వసంతాలు పూర్తి 14వ వసంతంలోకి

అమ్మవారి ప్రతిష్ఠాపన అనంతరం ప్రతి ఏడాది నవరాత్రి ఉత్సవాలను గ్రామస్థులు అత్యంత భక్తిశ్రద్ధలతో నిర్వహిస్తున్నారు. తొమ్మిది రోజుల పాటు నియమ నిష్ఠలు పాటిస్తూ ఉపవాసాలు, ప్రత్యేక పూజలు నిర్వహిస్తారు. గ్రామ యువత, కమిటీ సభ్యులు ముందుండి ఉత్సవాలను నిర్వహిస్తూ వస్తున్నారు.

అమ్మవారి కటాక్షంతో గ్రామంలో యువతకు ఉద్యోగ అవకాశాలు లభించడం, పాడి పంటలు సమృద్ధిగా ఉండటం వంటి శుభపరిణామాలు చోటుచేసుకుంటున్నాయని భక్తులు విశ్వసిస్తున్నారు. అమ్మవారి ఉత్సవాలు గ్రామస్థుల మధ్య ఐక్యతను మరింత బలోపేతం చేస్తున్నాయని చెబుతున్నారు.

13 వసంతాలు పూర్తి చేసుకున్న అమ్మవారి ప్రతిష్ఠాపన ఇప్పుడు 14వ వసంతంలోకి అడుగుపెడుతోంది. ఈ సందర్భంగా మరింత భక్తిశ్రద్ధలతో ఉత్సవాలను నిర్వహించేందుకు యువత, కమిటీ సభ్యులు ఏర్పాట్లు చేస్తున్నారు.

పల్లకిలో అమ్మవారి ఊరేగింపు

2025లో అమ్మవారిని పల్లకిలో గ్రామ పురవీధుల్లో ఊరేగించినట్లు యువత, కమిటీ సభ్యులు తెలిపారు. భక్తులు పెద్ద సంఖ్యలో పాల్గొని అమ్మవారికి ప్రత్యేక పూజలు నిర్వహించారు. పల్లకిలో అమ్మవారి ఊరేగింపు గ్రామంలో భక్తి వాతావరణాన్ని నెలకొల్పింది.

ఈ ఉత్సవాల్లో మరో ప్రత్యేకమైన సంప్రదాయం కొనసాగుతోంది. అమ్మవారి నిమజ్జన ఊరేగింపు పూర్తయిన అనంతరం చెరువు వద్ద ప్రత్యేక పూజా విధానాలు నిర్వహిస్తారు. అనంతరం చెరువు నీటిని చల్లి శుభ్రపరిచిన తర్వాత వేద పండితుల ఆధ్వర్యంలో శాస్త్రోక్తంగా నియమ నిష్ఠలను ముగిస్తారు.