వేములవాడ ఆలయ ఉద్యోగుల పునఃబదిలీకి వికాస్ రావు విజ్ఞప్తి

వేములవాడ శ్రీ పార్వతి రాజరాజేశ్వర స్వామి దేవస్థానం నుంచి కొండగట్టు, బాసర, కొమురవెల్లి వంటి ప్రముఖ ఆలయాలకు బదిలీ అయిన ఉద్యోగులను తిరిగి వేములవాడకు బదిలీ చేసే అంశాన్ని ప్రభుత్వం మానవతా దృక్పథంతో పరిశీలించాలని బీజేపీ రాష్ట్ర అధికార ప్రతినిధి చెన్నమనేని వికాస్ రావు కోరారు. ఈ మేరకు ఆయన గురువారం విడుదల చేసిన వీడియో సందేశంలో ప్రభుత్వానికి విజ్ఞప్తి చేశారు.

సాధారణ బదిలీల ప్రక్రియలో భాగంగా ఇతర ఆలయాలకు వెళ్లిన ఉద్యోగులు ఇప్పటికే అక్కడ రెండేళ్లకు పైగా విధులు నిర్వహించారని వికాస్ రావు తెలిపారు. వారి పరిస్థితులను పరిగణనలోకి తీసుకుని, తిరిగి వేములవాడ శ్రీ రాజరాజేశ్వర స్వామి దేవస్థానంలో పనిచేసే అవకాశం కల్పించాలని కోరారు.

వేములవాడ ఆలయంలో దీర్ఘకాలంగా పనిచేసిన ఉద్యోగులకు దేవస్థాన పరిపాలన, భక్తులకు అందించే సేవలు, ఆలయ కార్యకలాపాలపై పూర్తి అవగాహన ఉందని ఆయన తెలిపారు. అనుభవజ్ఞులైన సిబ్బంది తిరిగి విధుల్లో చేరితే ఆలయ పరిపాలన మరింత సమర్థవంతంగా కొనసాగడంతోపాటు, భక్తులకు మెరుగైన సేవలు అందించేందుకు అవకాశం ఉంటుందని ఆయన అభిప్రాయపడ్డారు.

ఇతర ఆలయాలకు బదిలీ అయిన పలువురు ఉద్యోగులు కుటుంబ సమస్యలు, పిల్లల విద్య, అనారోగ్య సమస్యలతో ఇబ్బందులు ఎదుర్కొంటున్నారని ఆయన తెలిపారు. ఈ అంశాలను ప్రభుత్వం పరిగణనలోకి తీసుకుని, ఉద్యోగుల సమస్యలను సానుభూతితో పరిశీలించి, తిరిగి వేములవాడ ఆలయానికి బదిలీ చేసేలా సానుకూల నిర్ణయం తీసుకోవాలని వికాస్ రావు విజ్ఞప్తి చేశారు.