భైంసా ప్రభుత్వ డిగ్రీ కళాశాలలో ఘనంగా ఎన్ఎస్ఎస్ దినోత్సవం

జాతీయ సేవా పథకం దినోత్సవాన్ని పురస్కరించుకుని కళాశాల ఎన్ఎస్ఎస్ విభాగాల ఆధ్వర్యంలో అవగాహన ర్యాలీని నిర్వహించారు. విద్యార్థులు సేవాభావం, సామాజిక బాధ్యత, పరిశుభ్రతపై నినాదాలు చేస్తూ ర్యాలీలో పాల్గొన్నారు. అనంతరం కళాశాల ప్రాంగణాన్ని శుభ్రం చేసి పరిశుభ్రత కార్యక్రమం చేపట్టారు.

స్వచ్ఛంద సేవకుల్లో లక్షణాల పెంపుదల

ఈ సందర్భంగా కళాశాల ఇన్చార్జి ప్రిన్సిపాల్ డా. కె. రఘునాథ్ మాట్లాడుతూ.. జాతీయ సేవా పథకం స్వచ్ఛంద సేవకుల్లో క్రమశిక్షణ, సేవాభావం, నాయకత్వ లక్షణాలు, బాధ్యత, సహనం, సమయపాలన, సహకార స్ఫూర్తి వంటి మంచి లక్షణాలు పెంపొందాలని సూచించారు. విద్యార్థులు సమాజ సేవలో చురుకుగా పాల్గొని బాధ్యతాయుతమైన పౌరులుగా ఎదగాలని ఆకాంక్షించారు.

ఎన్ఎస్ఎస్ ప్రాముఖ్యత

జాతీయ సేవా పథకం ప్రాముఖ్యత, లక్ష్యాలు, సమాజ సేవలో దాని పాత్రను జిల్లా కన్వీనర్ డా. ఓంప్రకాశ్ వివరించారు. ఈ పథకం ద్వారా విద్యార్థుల్లో సేవాభావం, సామాజిక బాధ్యత, మానవతా విలువలు పెంపొందుతాయని తెలిపారు. ఎన్ఎస్ఎస్ కార్యక్రమాల ద్వారా విద్యార్థులు సమాజంలోని సమస్యలను అర్థం చేసుకుని ప్రజలకు సేవ చేసే అవకాశాన్ని పొందుతున్నారని కార్యక్రమ అధికారి డా. నహీదా తబస్సుమ్ అన్నారు. ఎన్ఎస్ఎస్ విద్యార్థుల వ్యక్తిత్వ వికాసంతో పాటు సామాజిక స్పృహను పెంపొందిస్తుందని సహాయ ఆచార్యులు ఆరే రాజు తెలిపారు.

విపత్తుల సమయంలో స్పందనపై శిక్షణ అనుభవాలు

ఈ సందర్భంగా విద్యార్థులు తమ జాతీయ సేవా పథకం అనుభవాలను పంచుకున్నారు. ముఖ్యంగా ఆదిలాబాద్లో నిర్వహించిన సేవా శిబిరంలో విపత్తుల సమయంలో ఎలా స్పందించాలి, ప్రజలకు ఎలా సహాయం అందించాలి అనే అంశాలపై పొందిన శిక్షణ అనుభవాలను వివరించారు. విద్యార్థుల సమగ్ర వ్యక్తిత్వ వికాసంలో జాతీయ సేవా పథకం కీలక పాత్ర పోషిస్తుందని కళాశాల అంతర్గత నాణ్యతా హామీ విభాగం సమన్వయకర్త డా. యు. రవికుమార్ అన్నారు. కార్యక్రమంలో సీనియర్ అధ్యాపకులు డా. జె. భీమారావు, డా. పవన్ కుమార్, డా. ఎం. శంకర్, డా. కల్పన పాల్గొన్నారు.