డిండి ఎత్తిపోతల పథకం రద్దు చేయాలి: ప్రజా సంఘాల ఐక్య వేదిక

ఉమ్మడి జిల్లాకు న్యాయంగా దక్కాల్సిన నీటిని డిండి ఎత్తిపోతల పథకం పేరుతో నల్గొండ జిల్లాకు తరలిస్తున్నారని ప్రజా సంఘాల ఐక్య వేదిక ప్రతినిధులు పేర్కొన్నారు. డిండి ఎత్తిపోతల పథకం నిర్మాణం పూర్తయితే పాలమూరురంగారెడ్డి ఎత్తిపోతల పథకం కింద చేపట్టనున్న రిజర్వాయర్లకు నీరు అందని పరిస్థితి ఏర్పడుతుందని, లక్ష్మీదేవిపల్లి రిజర్వాయర్ నిర్మాణం కూడా కేవలం ఉత్సవ విగ్రహంగా మిగిలిపోయే అవకాశం ఉందని వారు ఆందోళన వ్యక్తం చేశారు.

పాదయాత్రకు పిలుపు

పాలమూరు జిల్లాను ఎడారిగా మార్చే డిండి ఎత్తిపోతల పథకాన్ని రద్దు చేయాలని డిమాండ్ చేస్తూ ఈ నెల 27న ఆదివారం ఉల్పర నుంచి కల్వకుర్తి వరకు పెండింగ్ ప్రాజెక్టుల సాధన జేఏసీ ఆధ్వర్యంలో పాదయాత్ర నిర్వహించనున్నట్లు తెలిపారు. ఈ పాదయాత్రకు సంబంధించిన వివరాలను వెల్లడించేందుకు ఈ రోజు సాయంత్రం 4 గంటలకు షాద్నగర్ పెన్షనర్స్ భవన్లో విలేకరుల సమావేశం నిర్వహించనున్నారు.

విలేకరుల సమావేశం

ఈ సమావేశానికి పెండింగ్ ప్రాజెక్టుల సాధన జేఏసీ చైర్మన్ రాజేందర్ రెడ్డి, పాలమూరు అధ్యయన వేదిక కన్వీనర్ రాఘవాచారి హాజరై పాదయాత్రకు సంబంధించిన వివరాలను వెల్లడిస్తారని తెలిపారు. కావున మీడియా మిత్రులు, పాత్రికేయులు అందరూ ఈ రోజు సాయంత్రం 4 గంటలకు షాద్నగర్ పెన్షనర్స్ భవన్కు హాజరై విలేకరుల సమావేశాన్ని విజయవంతం చేయాలని ప్రజా సంఘాల ఐక్య వేదిక కోరింది.