భర్త మురళిని రోకలిబండతో దాడి చేసి హత్య చేసిన కేసులో భార్య విజయలక్ష్మికి జిల్లా ప్రధాన న్యాయస్థానం జీవిత ఖైదుతో పాటు రూ.6 వేల జరిమానా విధించింది. ఈ కేసులో పకడ్బందీగా దర్యాప్తు చేసి, బలమైన సాక్ష్యాధారాలను సమర్పించిన పోలీసు అధికారులను జిల్లా ఎస్పీ అభినందించారు.
మనోహరాబాద్ పోలీసుల వివరాల ప్రకారం, పార్కిబండ గ్రామానికి చెందిన మురళికి, మనోహరాబాద్కు చెందిన విజయలక్ష్మితో 22 ఏళ్ల క్రితం వివాహమైంది. వీరికి ఇద్దరు పిల్లలు ఉన్నారు. కొంతకాలంగా కుటుంబ విషయాలపై భార్యాభర్తల మధ్య తరచూ గొడవలు జరుగుతుండటంతో పోలీసులు పలుమార్లు కౌన్సెలింగ్ నిర్వహించారు. గ్రామ పెద్దల సమక్షంలోనూ పంచాయతీలు నిర్వహించి ఇరువురికి నచ్చజెప్పారు.
సుమారు 18 నెలల క్రితం మురళికి రోడ్డు ప్రమాదంలో కాలు విరగడంతో పనికి వెళ్లకుండా ఇంటి వద్దే ఉండేవాడు. ఈ విషయమై భార్యాభర్తల మధ్య తరచూ వివాదాలు జరిగేవి. ఈ క్రమంలో 2015 రాత్రి మురళి మంచంపై నిద్రిస్తున్న సమయంలో విజయలక్ష్మి రోకలిబండతో దాడి చేయడంతో తీవ్రంగా గాయపడి మృతి చెందాడు.
కేసు నమోదు, దర్యాప్తు
కుటుంబ సభ్యుల ఫిర్యాదు మేరకు 2016లో అప్పటి మనోహరాబాద్ ఎస్ఐ రాజు కేసు నమోదు చేసి దర్యాప్తు చేపట్టారు. అప్పటి దర్యాప్తు అధికారి, తూప్రాన్ సీఐ స్వామిగౌడ్ పూర్తి స్థాయిలో సాక్ష్యాధారాలను సేకరించి న్యాయస్థానంలో అభియోగపత్రం దాఖలు చేశారు.
విచారణ, తీర్పు
ప్రస్తుత దర్యాప్తు అధికారి వెంకట రాజాగౌడ్, మనోహరాబాద్ ఎస్ఐ సుభాష్ గౌడ్ సాక్షులను న్యాయస్థానంలో ప్రవేశపెట్టి, కేసు విచారణను సమర్థవంతంగా ముందుకు తీసుకెళ్లారు. ప్రభుత్వ న్యాయవాది వెంకటేష్ బలమైన వాదనలు వినిపించారు. సాక్ష్యాధారాలను పరిశీలించిన జిల్లా ప్రధాన న్యాయమూర్తి నీలిమ నిందితురాలికి జీవిత ఖైదుతో పాటు రూ.6 వేల జరిమానా విధించారు.
అధికారులకు అభినందనలు
కేసు విచారణలో కోర్టు లైజన్ అధికారులు ఎస్ఐ విఠల్, కానిస్టేబుల్ రవీందర్ గౌడ్, సీడీఓ మహిపాల్ రెడ్డి సహకరించారు. నిందితురాలికి శిక్ష పడేలా సమర్థవంతంగా దర్యాప్తు చేసి, పటిష్ఠమైన సాక్ష్యాధారాలను న్యాయస్థానంలో సమర్పించిన దర్యాప్తు అధికారులను, కోర్టు లైజన్ అధికారులను, సిబ్బందిని ఎస్పీ అభినందించారు.
