చైనా అధ్యక్షుడు సీ జిన్పింగ్ మూడు రోజుల అమెరికా పర్యటన ముగిసింది. అధ్యక్షుడు డోనాల్డ్ ట్రంప్తో జరిగిన చర్చల్లో ఇరు దేశాల మధ్య ఎనిమిది అంశాలపై ఏకీభావం కుదిరింది. పరస్పర గౌరవం, నిర్మాణాత్మక సంబంధాల దిశగా అడుగులు వేయాలని నిర్ణయించారు. వాణిజ్య, అణ్వాయుధాలు, ఇరాన్ వంటి కీలక అంశాలపై చర్చలు జరిగాయి.
గత వారంలో మూడు రోజుల పాటు చైనా అధినేత సీ జిన్పింగ్ అమెరికా పర్యటన జరిపారు. అసాధారణ రీతిలో అధ్యక్షుడు డోనాల్డ్ ట్రంప్ బేస్ ఆండ్రూస్ విమానాశ్రయం వెళ్లి మరీ రెడ్ కార్పెట్తో స్వాగతం పలకటంతో అమెరికా, యావత్ ప్రపంచ మీడియా కూడా దీనికి ఎంతో ప్రాచుర్యం కల్పించింది. దీర్ఘకాలం తరువాత చైనా అధినేత అమెరికా పర్యటన జరిపాడు. అప్పటికీ ఇప్పటికీ రెండు దేశాలలో ఎన్నో మార్పులు జరిగాయి. అనేక రంగాలలో అమెరికా బలహీనపడగా, చైనా తన స్థానాన్ని మెరుగుపరుచుకుంది. ఉభయ నేతలు భిన్నమైన తమ ప్రాధాన్యతలను మరింత ముందుకు తీసుకుపోయేందుకు ప్రయత్నం చేస్తున్న తరుణమిది. అయితే, అది ఎక్కడా బహిరంగ ప్రకటనల్లో కనిపించదు.
సీ జిన్పింగ్ పర్యటనలో ఎనిమిది అంశాలపై ఏకీభావం కుదిరిందని శనివారం నాడు చైనా ప్రకటించింది. పరస్పర గౌరవం, అరమరికలు లేకుండా ఉభయ దేశాల సంబంధాలను నిర్మాణాత్మకంగా ముందుకు తీసుకుపోవాలని నిర్ణయించారు. ఒక పక్షం గెలిచింది, ఒక పక్షం ఓడింది అన్నట్లు కాకుండా, ఉభయులు లబ్ధి పొందేందుకు అంగీకరించారు. అయితే గత చరిత్ర, అనుభవాన్ని బట్టి అమెరికా దీనికి కట్టుబడి ఉంటుందా అన్న ప్రశ్న ఎప్పుడూ ఉంటుంది. అమెరికాకు అగ్రస్థానం అన్న ట్రంప్ లక్ష్యం నెరవేరాలంటే, ప్రపంచాధిపత్యం కోసం ప్రయత్నించకుండా సాధ్యం కాదు. దానిలో భాగంగా అన్ని దేశాల మీద పన్నుల కొరడా ఝళిపిస్తానంటూ ట్రంప్ ప్రకటించిన సంగతి తెలిసిందే. మీరిచ్చే మర్యాదకు ప్రతిగా మేము కూడా చేస్తామని చైనా హెచ్చరించడంతో, అమెరికా వెనకడుగు వేయాల్సి వచ్చింది. అది వ్యూహాత్మకమా, దానికి శక్తి లేకనా అన్నది ముందు ముందు తెలుస్తుంది.
అణ్వాయుధాలు, వాణిజ్యంపై ఒప్పందాలు
అణ్వాయుధాలను సమకూర్చుకోబోమన్న అంగీకారాన్ని ఇరాన్ అమలు చేయాలని ఇద్దరు నేతలూ ఆకాంక్షించారు. హర్మూజ్ జలసంధి అంతర్జాతీయ జలాల్లో ఏ దేశమూ లేదా సంస్థ కూడా నౌకల రాకపోకలపై పన్ను వసూలు చేయకూడదని కూడా ఏకీభావంతో వెల్లడించారు. రెండవ ప్రపంచ యుద్ధంలో చైనా, అమెరికా రెండూ మిత్రదేశాలుగా విజయం కోసం పోరాడిన అంశాన్ని గుర్తు చేసుకొని, టోక్యో విచారణకు ఎనభై సంవత్సరాలు నిండుతున్నాయని, భద్రతా మండలి శాశ్వత సభ్య రాజ్యాలుగా ఉన్న చైనా, అమెరికా రెండవ ప్రపంచ యుద్ధం తరువాత నెలకొన్న ప్రపంచ వ్యవస్థకు ఇరు దేశాలూ కట్టుబడి ఉండాలని, మరోసారి సైనికవాదం తలెత్తకుండా చూడాలని అభిప్రాయపడ్డారు (జపాన్ రాజ్యాంగాన్ని మార్చుకొని ఆత్మరక్షణ దళాల స్థానంలో పూర్తి స్థాయి మిలిటరీని సమకూర్చుకోవాలని చూడడాన్ని, అది అమెరికా మిత్ర దేశంగా ఉన్న అంశాన్ని ఈ సందర్భంగా గుర్తు చేసుకోవటం అవసరం). వాణిజ్య విషయానికి వస్తే, ఉభయ దేశాల బృందాల చర్చలలో ముందుకు వచ్చిన వాణిజ్య మండలి, 30 బిలియన్ డాలర్ల వంతున ఇరు దేశాలూ పన్నుల తగ్గింపు అమలుకు పూనుకోవాలని కూడా ట్రంప్-జిన్పింగ్ అంగీకరించారు. కృత్రిమ మేధ (ఏఐ) సంబంధిత ముప్పు-లాభాల గురించి అభిప్రాయ మార్పిడికి ఒక యంత్రాంగాన్ని నవంబర్ నాటికి ఏర్పాటు చేసుకోవాలని నిర్ణయించారు.
ఇరాన్, ఐరోపాపై ప్రభావం
