నిర్మల్ పట్టణంలోని అంబేద్కర్ భవన సౌకర్యాల మెరుగుదలకు రూ. 30 లక్షల నిధులు మంజూరు చేయనున్నట్లు సాంఘిక సంక్షేమ శాఖల మంత్రి అడ్లూరి లక్ష్మణ్ కుమార్ హామీ ఇచ్చారు. కాంగ్రెస్ పార్టీ నిర్మల్ నియోజక వర్గ బాధ్యుడు కుచాడి శ్రీహరి రావు బుధవారం హైదరాబాద్ లోని మంత్రి నివాసంలో కలిసి ఈ మేరకు వినతి పత్రం అందజేశారు.
అంబేద్కర్ భవనంలో ప్రతిధ్వని నివారణ, అతిథుల సౌలభ్యం కోసం కుర్చీలు, ఇతర అవసరమైన సౌకర్యాలు కల్పించాలని, అలాగే భవనంలో స్టడీ సర్కిల్ ఏర్పాటు చేయాలని వినతి పత్రంలో కోరారు. ఈ అభ్యర్థనలకు మంత్రి సానుకూలంగా స్పందించినట్లు శ్రీహరి రావు తెలిపారు. భవనంలో అవసరమైన మరమ్మతులు, సౌకర్యాల కల్పనకు గాను రూ. 30 లక్షల నిధులను వెంటనే మంజూరు చేస్తామని మంత్రి అడ్లూరి లక్ష్మణ్ కుమార్ హామీ ఇచ్చారని శ్రీహరి రావు వెల్లడించారు. ఈ నిధులతో భవనంలో మెరుగైన వసతులు కల్పించబడతాయని భావిస్తున్నారు. ఈ కార్యక్రమంలో సారంగాపూర్ మార్కెట్ కమిటీ ఛైర్మెన్ అబ్దుల్ హాది, అంబేద్కర్ యువజన జిల్లా నాయకులు కొంతం మురళీధర్, మధుకర్, అనిల్ తదితరులు పాల్గొన్నారు. వీరంతా కలిసి మంత్రికి భవన పరిస్థితులను వివరించారు.
