రెవెన్యూ అధికారుల తప్పిదాల కారణంగా ముధోల్ నియోజకవర్గంలోని వందలాది మంది రైతులు ఏళ్ల తరబడి ఇబ్బందులు ఎదుర్కొంటూ, కోట్లాది రూపాయలు నష్టపోయారని ఎమ్మెల్యే పవార్ రామారావు పటేల్ ఆవేదన వ్యక్తం చేశారు. సోమవారం మండలంలోని రాంటెక్ గ్రామంలో నిర్వహించిన రెవెన్యూ గ్రామసభలో ఆయన మాట్లాడారు.
గతంలో కొందరు రైతులకు మాయమాటలు చెప్పి వారి భూములను పంజాబ్ కంపెనీకి విక్రయించేలా చేశారని ఎమ్మెల్యే ఆరోపించారు. ఒక రైతు భూమి విక్రయించినప్పుడు, అదే సర్వే నంబరులో ఉన్న ఇతర రైతుల భూములను సైతం నిషేధిత జాబితాలో చేర్చడం వల్ల అనేక మంది రైతులు తీవ్రంగా నష్టపోయారని పేర్కొన్నారు. రాంటెక్ గ్రామంలో 37 ఎకరాల 20 గుంటల భూమిని విక్రయించగా, మొత్తం 295 ఎకరాలను నిషేధిత జాబితాలో చేర్చారని తెలిపారు. వెంకటాపూర్ గ్రామంలో 35 ఎకరాల భూమి విక్రయించగా, 152 ఎకరాలను నిషేధిత జాబితాలో చేర్చడంతో 152 మంది రైతులు ఇబ్బందులు ఎదుర్కొంటున్నారని వివరించారు.
ఈ కారణంగా రెండు గ్రామాల్లోని రైతులు రైతుబంధు పథకం కింద సుమారు రూ.3.60 కోట్ల మేర నష్టపోయారని ఎమ్మెల్యే తెలిపారు. తానూర్ మండలంలోనూ ఇదే పరిస్థితి ఉందని, రైతులు సుమారు రూ.100 కోట్ల వరకు నష్టపోయినట్లు పేర్కొన్నారు. భూములు తమ సొంతమైనప్పటికీ నిషేధిత జాబితాలో ఉండటంతో రైతుబంధు, రైతుబీమా, బ్యాంకు రుణాలు, ఇతర ప్రభుత్వ పథకాలు పొందలేకపోతున్నారని ఆవేదన వ్యక్తం చేశారు. ఈ సమస్యను రాష్ట్ర రెవెన్యూ శాఖ మంత్రి పొంగులేటి శ్రీనివాస్ రెడ్డి దృష్టికి తీసుకెళ్లడంతో బాధిత గ్రామాల్లో రెవెన్యూ గ్రామసభల నిర్వహణకు ప్రభుత్వం అనుమతి ఇచ్చిందని ఎమ్మెల్యే తెలిపారు. రైతుల సమస్యలను పరిశీలించి, నిషేధిత జాబితా నుంచి అర్హులైన రైతుల భూములను తొలగించేందుకు చర్యలు తీసుకుంటామని హామీ ఇచ్చారు. రైతులకు అన్యాయం జరగకుండా చూస్తామని స్పష్టం చేశారు.
అంతకుముందు రాంటెక్ సర్పంచ్ గంగాధర్, సీనియర్ నాయకుడు నర్సా గౌడ్ తదితరులు సమస్యను ఎమ్మెల్యే దృష్టికి తీసుకెళ్లి పరిష్కారానికి ప్రత్యేక చొరవ చూపుతున్నందుకు కృతజ్ఞతలు తెలిపారు. గ్రామసభల్లో ఆయా గ్రామాల సర్పంచులు, రెవెన్యూ అధికారులు పాల్గొన్నారు.
