నిర్మల్ జిల్లా బాసర గోదావరి తీరంలో వివాదం నెలకొంది. 2015లో అప్పటి మంత్రి అల్లోల ఇంద్రకరణ్ రెడ్డి చేతుల మీదుగా భూమి పూజ చేసిన ప్రభుత్వ శిలాఫలకం మాయమైందని, కరెంటు పోల్స్ ను ప్రైవేట్ హోటల్ నిర్వాహకులు ఆక్రమించుకున్నారని గ్రామస్తులు ఆరోపిస్తున్నారు. రాబోయే పుష్కరాలకు కేవలం 8 నెలల సమయం మాత్రమే ఉండగా ఈ పరిణామాలపై భక్తులు ఆందోళన వ్యక్తం చేస్తున్నారు.
బాసర గోదావరి తీరంలోని సూర్యేశ్వర శివాలయం సమీపంలో 14.04.2015న 1070 లక్షల వ్యయంతో గోదావరి పుష్కరాల స్నాన ఘట్టాల నిర్మాణానికి అప్పటి మంత్రి అల్లోల ఇంద్రకరణ్ రెడ్డి భూమి పూజ చేశారు. ఈ సందర్భంగా ఏర్పాటు చేసిన ప్రభుత్వ శిలాఫలకం ప్రస్తుతం ఆ ప్రాంతంలో కనిపించడం లేదని, దానిని తొలగించారని గ్రామస్తులు ఆరోపిస్తున్నారు. ముఖ్యంగా శ్రీశ్రీశ్రీ దశరథ మహారాజు విగ్రహం వెనుక వైపున గల శిలాఫలకం కనిపించకుండా పోయింది.
శిలాఫలకం ఉన్న స్థలంతో పాటు దాని ప్రక్కన ఉన్న కరెంటు పోల్స్ ను కూడా ప్రైవేట్ హోటల్ నిర్వాహకులు తమ ఆధీనంలోకి తీసుకుని, తమ హోటళ్లకు విద్యుత్ సరఫరా కోసం వినియోగిస్తున్నారని స్థానికులు చెబుతున్నారు. ఇది ప్రభుత్వ ఆస్తిని ఆక్రమించడమేనని వారు పేర్కొంటున్నారు.
2026 నుండి జరగనున్న గోదావరి పుష్కరాలకు కేవలం 8 నెలల సమయం మాత్రమే మిగిలి ఉంది. ఈ నేపథ్యంలో, ఆలయం సమీపంలో ఉన్న ఈ చారిత్రక శిలాఫలకం మాయమవడం, ప్రభుత్వ స్థలం, విద్యుత్ స్తంభాలు ఆక్రమణకు గురవడం పుష్కర పవిత్రతకు భంగమని భక్తులు ఆవేదన వ్యక్తం చేస్తున్నారు. ఈ నిర్మాణాలు, ఆక్రమణలు గత బీఆర్ఎస్ ప్రభుత్వ హయాంలో అధికార పార్టీకి చెందిన కొందరు ప్రభావవంతమైన నాయకుల ప్రోత్సాహంతోనే జరిగాయని స్థానికులు ఆరోపిస్తున్నారు.
ప్రభుత్వ ఆస్తిని తొలగించడం, ఆక్రమించడం పబ్లిక్ ప్రాపర్టీ చట్టం ప్రకారం నేరం అని గ్రామస్తులు గుర్తు చేస్తున్నారు. ఈ నేపథ్యంలో, నిర్మల్ కలెక్టర్, బైంసా ఆర్డీవో, బాసర తహసిల్దార్, ఇరిగేషన్ మరియు విద్యుత్ శాఖ అధికారులు తక్షణమే స్పందించి, శిలాఫలకం ఎక్కడ ఉందో విచారణ జరిపి, ఆక్రమణలను తొలగించి పునరుద్ధరించాలని గ్రామస్తులు డిమాండ్ చేస్తున్నారు.
