నేషనల్ కంపెనీ లా ట్రిబ్యునల్ (ఎన్సీఎల్టీ), నేషనల్ కంపెనీ లా అప్పిలేట్ ట్రిబ్యునల్ (ఎన్సీఎల్ఏటీ) పరిపాలనా వ్యవహారాల్లో కేంద్ర కార్పొరేట్ వ్యవహారాల శాఖ జోక్యంపై సుప్రీంకోర్టు తీవ్ర అసంతృప్తి వ్యక్తం చేసింది. ట్రిబ్యునళ్ల స్వతంత్రతకు విఘాతం కలిగించేలా నియామక వ్యవస్థను మంత్రిత్వ శాఖ తన ఆధీనంలోకి తీసుకుంటోందని వ్యాఖ్యానించింది. సిబ్బంది నియామక అధికారాలు ట్రిబ్యునళ్ల అధ్యక్షుల వద్దే ఉండాలని స్పష్టం చేసింది.
భారత ప్రధాన న్యాయమూర్తి జస్టిస్ సూర్యకాంత్ నేతృత్వంలోని ముగ్గురు సభ్యుల ధర్మాసనం గురువారం ఈ అంశంపై విచారణ సందర్భంగా కీలక వ్యాఖ్యలు చేసింది. ధర్మాసనంలో న్యాయమూర్తులు జస్టిస్ జాయ్మాల్య బాగ్చి, జస్టిస్ వి. మోహన కూడా ఉన్నారు.
నియామకాలపై అభ్యంతరం
ఎన్సీఎల్టీ, ఎన్సీఎల్ఏటీల్లో పరిపాలనా సిబ్బంది నియామక ప్రక్రియను ప్రైవేటు సంస్థకు అప్పగించడంపై కొందరు కాంట్రాక్టు ఉద్యోగులు సుప్రీంకోర్టును ఆశ్రయించారు. న కార్పొరేట్ వ్యవహారాల శాఖ తీసుకున్న నిర్ణయం వల్ల ప్రస్తుతం పనిచేస్తున్న ఉద్యోగులు లేదా 2 నుంచి విధులకు దూరమయ్యే పరిస్థితి ఏర్పడవచ్చని వారి తరఫు న్యాయవాది మీనాక్షి అరోరా కోర్టుకు వివరించారు. ఆ ఉద్యోగులు ఆరేళ్లకు పైగా సేవలందిస్తున్నారని, నియామక నిబంధనల్లో క్రమబద్ధీకరణకు సంబంధించిన అంశాలు ఉన్నాయని ఆమె వాదించారు. ఎలాంటి ప్రత్యామ్నాయ ఏర్పాట్లు లేకుండా వారిని తొలగించడం అన్యాయమని పేర్కొన్నారు.
ఈ సందర్భంగా సీజేఐ సూర్యకాంత్ మాట్లాడుతూ.. ట్రిబ్యునల్ నియామక వ్యవస్థను కార్పొరేట్ వ్యవహారాల శాఖ పూర్తిగా తన ఆధీనంలోకి తీసుకున్నట్లు కనిపిస్తోందని, ఇది సంస్థ స్వతంత్రతను దెబ్బతీస్తోందని వ్యాఖ్యానించారు. నియామకాల్లో ట్రిబ్యునల్ అధ్యక్షులకే పూర్తి అధికారం ఉండాలని అభిప్రాయపడ్డారు.
యూపీఎస్సీ, ఎస్ఎస్సీ ద్వారా నియామకాలు
ట్రిబ్యునళ్లలో సిబ్బంది కొరతను అధిగమించేందుకు తాత్కాలికంగా అనుభవం ఉన్న ప్రభుత్వ ఉద్యోగులను డిప్యుటేషన్పై నియమించాలని సుప్రీంకోర్టు సూచించింది. దీర్ఘకాలిక పరిష్కారంగా దశలవారీగా శాశ్వత నియామకాలు చేపట్టాలని పేర్కొంది. ఇందుకోసం యూనియన్ పబ్లిక్ సర్వీస్ కమిషన్ (యూపీఎస్సీ), స్టాఫ్ సెలక్షన్ కమిషన్ (ఎస్ఎస్సీ) సహకారం తీసుకోవచ్చని సూచించింది.
అయితే, ప్రస్తుతం కాంట్రాక్టు విధానంలో పనిచేస్తున్న ఉద్యోగులకు కేవలం ఎక్కువకాలం పనిచేశారనే కారణంతో కొనసాగింపు హామీ ఇవ్వలేమని ధర్మాసనం స్పష్టం చేసింది. వారి నియామక ప్రక్రియపైనా ప్రశ్నలు లేవనెత్తింది. ఈ అంశంలో మధ్యంతర రక్షణ కల్పించేందుకు కోర్టు నిరాకరించింది.
253 పోస్టులు ఖాళీ
ఎన్సీఎల్టీకి మంజూరైన 320 పరిపాలనా పోస్టుల్లో కేవలం 67 మాత్రమే భర్తీ అయ్యాయని, ఇంకా 253 పోస్టులు ఖాళీగా ఉన్నాయని నివేదికలు వెల్లడించాయి. న్యాయ, సాంకేతిక సభ్యుల పోస్టుల్లోనూ ఖాళీలు ఉన్నట్లు కోర్టు దృష్టికి వచ్చింది. సిబ్బంది కొరతతో పాటు మౌలిక సదుపాయాల సమస్యలు ట్రిబ్యునళ్ల పనితీరుపై ప్రభావం చూపుతున్నాయని న్యాయవాదులు వివరించారు.
ఎన్సీఎల్టీ, ఎన్సీఎల్ఏటీల అధ్యక్షులు తమ సంస్థలకు అవసరమైన భవనాలు, స్థలాలు, పరిపాలనా సిబ్బంది, ఇతర మౌలిక సదుపాయాల వివరాలతో సమగ్ర ప్రతిపాదనలు సమర్పించాలని సుప్రీంకోర్టు ఆదేశించింది. నాలుగు వారాల్లో ఈ వివరాలు అందించాలని సూచించింది. ట్రిబ్యునళ్లకు అవసరమైన కనీస సదుపాయాలను వీలైనంత త్వరగా కల్పించేలా కేంద్ర ప్రభుత్వంతో మాట్లాడాలని అటార్నీ జనరల్ ఆర్. వెంకటరమణిని కోరింది.
