ప్యారడైజ్ సినిమా బాక్సాఫీస్ వద్ద ఎలా ఆడుతుందో, దాని స్టేటస్ ఏంటో పక్కన పెడితే, సినిమా ఎంతవరకు విజయవంతమవుతుందో తేలడానికి కనీసం వారాంతం వరకు ఆగాల్సిందే. ఈ సినిమాపై సోషల్ మీడియాలో జరుగుతున్న చర్చ ఈ మధ్య కాలంలో మరే సినిమాకూ లేదన్నది వాస్తవం. ఇప్పుడు అసలు విషయం న్యాచురల్ స్టార్ నాని గురించి కాదు, శిఖంజి మాలిక్గా నటించిన మోహన్బాబు గురించి.
మోహన్బాబు విలన్గా నటించడం కొత్తేమీ కాదు. అల్లుడుగారు సినిమా హిట్ అయ్యేంత వరకు ఆయన చేసినవి అధిక శాతం ప్రతినాయక పాత్రలే. ఎంత నెగటివ్ షేడ్స్ ఉన్నప్పటికీ ఆ పాత్రలు ఆయనకు మంచి పేరు తీసుకొచ్చాయి. 90వ దశకంలో అసెంబ్లీ రౌడీ, రౌడీ గారి పెళ్ళాం, పెదరాయుడు వంటి సినిమాలు మాస్ మార్కెట్ను అమాంతం పెంచేశాయి. ఆ తర్వాత వరుస ఫ్లాపులు క్రమంగా ఆయన వైభవాన్ని తగ్గించాయి. విష్ణు, మనోజ్ కెరీర్ ప్లానింగ్ కోసం ఆయన చేసిన త్యాగాలు కొంతకాలం వెండితెరపై నుంచి దూరం చేశాయి. ఇదంతా గతం.
వర్తమానానికి వస్తే, ప్యారడైజ్లో మోహన్బాబు విలనిజం పీక్స్లో ఉంది. మధ్యలో రాఘవ జుయెల్కు ప్రాధాన్యం ఇచ్చినా, కలెక్షన్ కింగ్ తెరపై కనిపించిన ప్రతిసారీ అభిమానులు వింటేజ్ ఫీలింగ్ను పొందారు. నానితో ఫేస్-ఆఫ్ ఆలస్యంగా జరిగినప్పటికీ, ఫ్లాష్బ్యాక్లో మోహన్బాబు భయపెట్టిన తీరు, ఆయన చుట్టూ అల్లిన ప్రపంచం భిన్నంగా అనిపించాయి. అయితే, అందరూ ఏకగ్రీవంగా అంత పాజిటివ్గా ఉన్నారని చెప్పలేము. దర్శకుడు శ్రీకాంత్ ఓదెల మోహన్బాబును సంపూర్ణంగా వాడుకోలేదన్నది నిజం.
ఇకపై దర్శకనిర్మాతలు మోహన్బాబు కోసం పాత్రలను సృష్టించి, సరైన రీతిలో వాడుకుంటే అద్భుతాలు చేయవచ్చు. శ్రీనివాస మంగాపురంలో అజయ్ భూపతి చేసిన తడబాటు వల్ల, ఆ సినిమా ప్రజల దృష్టిలో పెద్దగా పడకుండానే వెళ్ళిపోయింది. ప్యారడైజ్ అయినా కొంచెం స్ట్రాంగ్గా నిలబడితే బాగుంటుంది. ఇదంతా ఎలా ఉన్నా, మోహన్బాబు సమకాలీకులైన చిరంజీవి, బాలకృష్ణ, వెంకటేష్, నాగార్జున వంటి వారిలో ఎవరో ఒకరితో ఏదైనా సినిమా ప్లాన్ చేస్తే క్లాష్ ఆఫ్ టైటాన్స్లా ఎంత బాగుంటుందో ఊహించుకోవచ్చు.
