దేశంలోని విశ్వవిద్యాలయాల్లో విద్యార్థులు ఎదుర్కొంటున్న తీవ్రమైన మానసిక, సామాజిక సమస్యలపై సుప్రీంకోర్టు నియమించిన నేషనల్ టాస్క్ఫోర్స్ ఆందోళనకర నివేదికను విడుదల చేసింది. గత ఏడాది కాలంలో 9 శాతం మంది విద్యార్థులు ఆత్మహత్య ఆలోచనలు, 15 శాతం మంది దీర్ఘకాలిక ఒత్తిడి, నిరాశ, ఆందోళనను ఎదుర్కొన్నట్లు సర్వే వెల్లడించింది. క్యాంపస్లో తాము బయటి వ్యక్తులుగా భావిస్తున్నట్లు 34 శాతం మంది పేర్కొన్నారు.
విశ్వవిద్యాలయాలు వేయి ఆలోచనలు వికసించే కేంద్రాలుగా ఉండాలి. విద్యార్థుల్లో ప్రశ్నించే తత్వాన్ని, సృజనాత్మకతను, ఆత్మవిశ్వాసాన్ని పెంచాలి. అయితే, ఉన్నత విద్యాసంస్థల్లో విద్యార్థులు ఎదుర్కొంటున్న పరిస్థితులపై సుప్రీంకోర్టు నియమించిన నేషనల్ టాస్క్ఫోర్స్ తాజా సర్వే ఆందోళనకర వాస్తవాలను బయటపెట్టింది. 2.43 లక్షలకు పైగా విద్యార్థుల నుంచి సేకరించిన వివరాల్లో, గత ఏడాది కాలంలో చాలా తరచుగా ఆత్మహత్య ఆలోచనలు వచ్చినట్లు 9 శాతం మంది తెలిపారు. గత ఆరు నెలల్లో దీర్ఘకాలిక ఒత్తిడి, నిరాశ లేదా ఆందోళనను ఎదుర్కొన్నట్లు మరో 15 శాతం మంది చెప్పారు. క్యాంపస్లో తాము ఏదో స్థాయిలో బయటి వ్యక్తులుగా భావిస్తున్నట్లు 34 శాతం మంది పేర్కొనడం పరిస్థితి తీవ్రతకు అద్దం పడుతోంది. చదువు, పరీక్షలు, మార్కులు, పోటీ, ఉద్యోగావకాశాలపై అనిశ్చితి విద్యార్థులపై ఒత్తిడి పెంచుతుండగా, దానికి కులవివక్ష, లింగవివక్ష, ర్యాగింగ్, వేధింపులు, ఆర్థిక ఇబ్బందులు, ఒంటరితనం తోడవుతున్నాయి. ముఖ్యంగా కులవివక్షపై టాస్క్ఫోర్స్ చేసిన పరిశీలనలు దిగ్భ్రాంతిని కలిగిస్తున్నాయి. కులం కారణంగా అవమానాలు, వివక్ష, అధ్యాపకుల నుంచి అసమాన వైఖరి వంటి అనుభవాలను విద్యార్థులు వెల్లడించినట్లు నివేదిక పేర్కొంది. విద్యార్థి తన ప్రతిభను నిరూపించుకోవాల్సిన ప్రదేశంలో, తన కులం కారణంగా తనను తాను తక్కువగా భావించే పరిస్థితి రావడం విద్యా వ్యవస్థకే అవమానం.
ఇటీవల దేశంలోని ప్రముఖ విద్యాసంస్థల్లో చోటుచేసుకున్న విద్యార్థుల ఆత్మహత్యలు ఈ నివేదిక ప్రాధాన్యతను మరింత పెంచుతున్నాయి. 2020-21 నుంచి 2024-25 మధ్య 23 ఐఐటి సంస్థల్లో 45 మంది విద్యార్థులు ఆత్మహత్యలకు పాల్పడినట్లు అధికారిక గణాంకాలు వెల్లడిస్తున్నాయి. వారిలో 28 మంది ఎస్సీ, ఎస్టీ, ఓబీసీ తరగతులకు చెందినవారున్నారు. వరుసగా జరుగుతున్న ఈ విషాద ఘటనలకు వ్యక్తిగత అంశాలను కారణంగా చూపి చేతులు దులుపుకునే ప్రయత్నం చేయడం సమస్య మూలాలను విస్మరించడమే. విద్యార్థుల మానసిక ఆరోగ్యానికి అవసరమైన సహాయక వ్యవస్థలు కూడా అనేక సంస్థల్లో తగినంతగా లేవని ఎన్టీఎఫ్ గుర్తించింది. తాజా సర్వేలో 32 శాతం మంది తమ సంస్థల్లో కౌన్సెలింగ్ సేవలు లేవని చెప్పారు. అంతకు ముందు 2,119 ఉన్నత విద్యాసంస్థల పరిశీలనలో 65 శాతం సంస్థల్లో విద్యార్థులకు మానసిక ఆరోగ్య నిపుణులు అందుబాటులో లేరని, 73 శాతం సంస్థల్లో అరకొరగా మాత్రమే ఉన్నారని తేలింది. అంటే, విద్యార్థి తీవ్రమైన ఒత్తిడిలో ఉన్నప్పుడు అతనికి మాట్లాడేందుకు, తన సమస్యను చెప్పుకునేందుకు, అవసరమైన సమయంలో సహాయం పొందేందుకు వ్యవస్థే అందుబాటులో లేని పరిస్థితి అనేక చోట్ల ఉంది.
