ఎల్వీ గ్రామంలో పొలం బాట కార్యక్రమంలో ఎంపీడీవో శ్రీధర్ పర్యటన

మండలంలోని ఎల్వీ గ్రామంలో నిర్వహించిన పొలం బాట కార్యక్రమంలో భాగంగా ఎంపీడీవో శ్రీధర్ పర్యటించారు. ఈ సందర్భంగా గ్రామంలోని రైతుల వ్యవసాయ పొలాలను సందర్శించి వివిధ పంటల పరిస్థితిని క్షేత్రస్థాయిలో పరిశీలించారు.

వర్షాభావ పరిస్థితుల కారణంగా పంటలకు జరిగిన నష్టంపై రైతులను అడిగి, వివరాలు తెలుసుకున్నారు. ఈ సందర్భంగా, రైతులు సాగులో ఎదుర్కొంటున్న ఇబ్బందులు, నీటి కొరత, పంటల ఎదుగుదల తదితర అంశాలపై వారితో చర్చించారు. వ్యవసాయంలో ఎదురయ్యే సమస్యలను అధికారుల దృష్టికి తీసుకువచ్చి, తగిన సూచనలు, సలహాలు పొందాలని రైతులకు తెలిపారు.

అలాగే, ప్రభుత్వం అమలు చేస్తున్న వ్యవసాయ పథకాలు, రైతులకు అందుతున్న ప్రయోజనాలపై అవగాహన కల్పించారు. పంటలను చీడపీడల నుంచి కాపాడేందుకు సకాలంలో సస్యరక్షణ చర్యలు చేపట్టాలని, వ్యవసాయ అధికారుల సూచనల మేరకు అవసరమైన జాగ్రత్తలు పాటించాలని రైతులకు సూచించారు.

రైతులకు ప్రభుత్వ పథకాలపై అవగాహన కల్పిస్తూ, వ్యవసాయ సమస్యలను క్షేత్రస్థాయిలో తెలుసుకునేందుకు పొలం బాట కార్యక్రమం ఉపయోగపడుతుందని పేర్కొన్నారు.