నిర్మల్, 7 September
జిల్లాలో అత్యవసర వైద్యం అందించేందుకు కోట్లాది రూపాయల వ్యయంతో నిర్మించిన 50 పడకల క్రిటికల్ కేర్ సెంటర్ భవనం పూర్తయి ఏడాది గడుస్తున్నా ఇప్పటికీ అందుబాటులోకి రాలేదు. నిపుణులైన వైద్యులు, సిబ్బంది కొరతతో అత్యవసర చికిత్సకు ఆటంకం ఏర్పడుతోంది. దీనివల్ల ప్రమాద బాధితులకు గోల్డెన్ అవర్లో వైద్యం అందక ప్రాణాలకు ముప్పు వాటిల్లుతోంది.
ప్రమాదం జరిగిన క్షణం నుంచి ప్రతి నిమిషం కీలకమే. ముఖ్యంగా రోడ్డు ప్రమాదాల్లో క్షతగాత్రులకు తొలి గంటలో అందే వైద్యం వారి ప్రాణాలను నిర్ణయించేంత ముఖ్యమైనది. వైద్య రంగంలో గోల్డెన్ అవర్గా పిలిచే ఈ సమయంలో అత్యవసర చికిత్స అందిస్తే ఎంతోమంది ప్రాణాలను కాపాడవచ్చు. అయితే జిల్లాలో మాత్రం పరిస్థితి ఇందుకు భిన్నంగా ఉంది. అత్యవసర వైద్యం అందించేందుకు కోట్లాది రూపాయల వ్యయంతో నిర్మించిన 50 పడకల క్రిటికల్ కేర్ సెంటర్ భవనం పూర్తయి ఏడాది గడుస్తున్నా ఇప్పటికీ అందుబాటులోకి రాకపోవడం విమర్శలకు తావిస్తోంది.
జిల్లా ప్రభుత్వ ప్రధాన ఆసుపత్రి (జీజీహెచ్) ఆవరణలో అత్యవసర చికిత్సలను అందించాలనే ఉద్దేశంతో 50 పడకల సామర్థ్యంతో క్రిటికల్ కేర్ సెంటర్ను ఏర్పాటు చేశారు. భవన నిర్మాణం పూర్తయి నెలలు గడుస్తున్నా వైద్య సేవలు మాత్రం ప్రారంభం కాలేదు. అత్యవసర విభాగానికి అనుబంధంగా ఉండాల్సిన ఈ కేంద్రం అందుబాటులోకి వస్తే ప్రమాద బాధితులకు సత్వర చికిత్స అందే అవకాశం ఉంది. కానీ ప్రారంభ ప్రక్రియలో జరుగుతున్న జాప్యం కారణంగా నిర్మాణం పూర్తయిన భవనం నిరుపయోగంగా మారింది.
రోడ్డు ప్రమాదంలో తీవ్రంగా గాయపడిన వారికి తొలి గంట అత్యంత కీలకం. తలకు గాయాలు, అంతర్గత రక్తస్రావం, ఎముకల విరుగుడు వంటి అత్యవసర పరిస్థితుల్లో వెంటనే నిపుణుల వైద్యం అందాలి. లో ఆ స్థాయి అత్యవసర వైద్య సదుపాయాలు అందుబాటులో లేకపోవడంతో బాధితులను నిజామాబాద్, హైదరాబాద్ వంటి దూర ప్రాంతాలకు తరలించాల్సిన పరిస్థితి నెలకొంది.
అంబులెన్స్లో గంటల తరబడి ప్రయాణించాల్సి రావడంతో చికిత్స ఆలస్యమవుతోంది. ఫలితంగా మార్గమధ్యంలోనే పరిస్థితి విషమించి ప్రాణాలు కోల్పోతున్న ఘటనలు ఆందోళన కలిగిస్తున్నాయి. సమయానికి స్థానికంగానే క్రిటికల్ కేర్ చికిత్స అందిస్తే పలువురి ప్రాణాలు నిలిచే అవకాశం ఉందని ప్రజలు పేర్కొంటున్నారు.
జాతీయ రహదారులపై తరచూ ప్రమాదాలు చోటుచేసుకునే జిల్లాగా కు ప్రత్యేక పరిస్థితులు ఉన్నాయి. ఈ నేపథ్యంలో ప్రమాద బాధితులకు తక్షణ వైద్యం అందించేందుకు నిర్మించిన క్రిటికల్ కేర్ సెంటర్ను త్వరితగతిన ప్రారంభించాల్సిన అవసరం ఉంది. అయితే భవనం సిద్ధమైనా సేవలు ప్రారంభించకపోవడంతో ప్రజాధనం వెచ్చించి నిర్మించిన మౌలిక వసతులు నిరుపయోగంగా మారుతున్నాయనే విమర్శలు వెల్లువెత్తుతున్నాయి.
క్రిటికల్ కేర్ సెంటర్ను ప్రారంభించేందుకు కేవలం భవనం సిద్ధంగా ఉంటే సరిపోదు. అవసరమైన వైద్యులు, నర్సింగ్, పారామెడికల్, సాంకేతిక సిబ్బందిని నియమించాల్సి ఉంటుంది. ముఖ్యంగా న్యూరో సర్జన్లు, ఆర్థోపెడిక్ సర్జన్లు, ఎమర్జెన్సీ మెడిసిన్ నిపుణులు, అనస్థీషియా వైద్యులు వంటి నిపుణుల సేవలు అత్యవసరం.
ప్రస్తుతం ప్రభుత్వ ఆసుపత్రి అత్యవసర విభాగంలో సిబ్బంది కొరత ఉండటంతో ప్రమాద బాధితులకు సమయానికి అవసరమైన వైద్యం అందించడంలో ఇబ్బందులు ఎదురవుతున్నాయని తెలుస్తోంది.
