విధి నిర్వహణలో ఉండగా ప్రయాణికురాలితో జరిగిన వివాదంలో తీవ్రంగా గాయపడి, చికిత్స పొందుతూ మరణించిన మణుగూరు ఆర్టీసీ డిపో మహిళా కండక్టర్ గుండ్ల ప్రవళిక మృతిపై ముఖ్యమంత్రి ఎ. రేవంత్ రెడ్డి తీవ్ర దిగ్భ్రాంతి వ్యక్తం చేశారు. ఆమె కుటుంబానికి ప్రభుత్వం అండగా ఉంటుందని, అన్ని విధాలా సహాయ సహకారాలు అందిస్తామని హామీ ఇచ్చారు. రూ.కోటి ప్రమాద బీమా, రూ.10 లక్షల పరిహారం, తల్లికి ఉద్యోగం కల్పిస్తామని ప్రభుత్వం ప్రకటించింది.
24 ఏళ్ల ప్రవళిక మణుగూరు డిపోలో తెలంగాణ రాష్ట్ర రోడ్డు రవాణా సంస్థ (టీజీఎస్ఆర్టీసీ) మహిళా కండక్టర్గా పనిచేస్తున్నారు. విధి నిర్వహణలో భాగంగా బస్సులో ప్రయాణికులతో జరిగిన చిన్నపాటి చిల్లర వివాదం చివరకు విషాదాంతమైంది. పది రోజుల పాటు ఆసుపత్రిలో మృత్యువుతో పోరాడిన ఆమె మంగళవారం రాత్రి కన్నుమూశారు. ఈ ఘటన ఆర్టీసీ ఉద్యోగుల్లో తీవ్ర విషాదాన్ని నింపింది.
ఘటన వివరాలు
మణుగూరు నుంచి భద్రాచలం వెళ్తున్న పల్లె వెలుగు బస్సులో ఈ ఘటన చోటుచేసుకుంది. ప్రయాణ సమయంలో మండలం మిట్టగూడెం ప్రాంతానికి చెందిన బానోత్ మౌనిక తన కుమారుడితో కలిసి బస్సు ఎక్కింది. తన కుమారుడికి టికెట్ తీసుకునే సమయంలో ఆమె రూ.100 నోటు ఇచ్చింది. కండక్టర్ ప్రవళిక టికెట్ జారీ చేసి, తన వద్ద చిల్లర లేకపోవడంతో మిగిలిన రూ.90ను తర్వాత ఇస్తానని చెప్పింది. అయితే వెంటనే చిల్లర ఇవ్వాలని ప్రయాణికురాలు పట్టుబట్టడంతో ఇద్దరి మధ్య వాగ్వాదం ప్రారంభమైంది.
