పదో తరగతి విద్యార్థులకు వ్యక్తిత్వ వికాసం, కెరీర్ మార్గదర్శకత్వంపై అవగాహన

జిల్లా పరిషత్ బాలుర ఉన్నత పాఠశాలలో పదో తరగతి విద్యార్థులకు వ్యక్తిత్వ వికాసం, భవిష్యత్తు విద్యా ప్రణాళిక, వృత్తి ఎంపికపై అవగాహన కార్యక్రమం నిర్వహించారు. విద్యార్థుల్లో ఆత్మవిశ్వాసం పెంపొందించడమే ఈ కార్యక్రమ లక్ష్యం. ఇంపాక్ట్ ఇంటర్నేషనల్ రీజియన్ 19 ఆధ్వర్యంలో బుధవారం నిర్వహించిన ఈ కార్యక్రమంలో ప్రముఖ ప్రేరణాత్మక ప్రసంగకర్త, శిక్షకులు వాడేకర్ లక్ష్మణ్ ముఖ్య శిక్షకుడిగా పాల్గొన్నారు. ఈ సందర్భంగా ఆయన మాట్లాడుతూ విద్యార్థులు చిన్ననాటి నుంచే జీవితంలో ఒక నిర్దిష్ట లక్ష్యాన్ని ఏర్పరచుకోవాలని సూచించారు. ఆత్మవిశ్వాసం, క్రమశిక్షణ, సమయపాలన, పట్టుదలతో ముందుకు సాగితే అనుకున్న లక్ష్యాలను సాధించవచ్చన్నారు. పరీక్షల పట్ల భయాన్ని వీడి, సానుకూల దృక్పథంతో చదువుపై దృష్టి సారించాలని సూచించారు.

అలాగే, పదో తరగతి అనంతరం ఉన్నత విద్యలో అందుబాటులో ఉన్న కోర్సులు, విద్యార్థుల ఆసక్తి, అభిరుచి, నైపుణ్యాలకు అనుగుణంగా సరైన విద్యా మార్గాన్ని ఎలా ఎంచుకోవాలనే అంశాలపై అవగాహన కల్పించారు. భవిష్యత్తులో ఉన్నత స్థాయికి చేరుకోవాలంటే నిరంతర సాధన, కృషి ఎంతో అవసరమని వివరించారు. ఈ కార్యక్రమంలో పాఠశాల ప్రధానోపాధ్యాయులు ఎస్. నర్సయ్య, ఉపాధ్యాయ బృందం, పదో తరగతి విద్యార్థులు పాల్గొన్నారు. విద్యార్థుల్లో ఆత్మవిశ్వాసాన్ని పెంపొందించి, భవిష్యత్తు లక్ష్యాల సాధనకు సరైన మార్గనిర్దేశం చేయడమే ఈ కార్యక్రమం ప్రధాన ఉద్దేశమని నిర్వాహకులు తెలిపారు.