వినాయక నిమజ్జనోత్సవాలను ప్రశాంత వాతావరణంలో నిర్వహించేందుకు నిజామాబాద్ పోలీస్ కమిషనరేట్ పరిధిలో పోలీసులు ముందస్తు చర్యలు చేపట్టారు. శాంతిభద్రతలకు విఘాతం కలిగించే అవకాశం ఉన్న వ్యక్తులను ముందస్తుగా గుర్తించి, 572 మందిపై బైండోవర్ చర్యలు చేపట్టినట్లు పోలీస్ కమిషనర్ పి. సాయి చైతన్య తెలిపారు. పోలీసు అధికారుల ఆదేశాల మేరకు గుర్తించిన వ్యక్తులను అదుపులోకి తీసుకుని, మండల రెవెన్యూ అధికారుల ఎదుట హాజరుపరిచారు. చట్టపరమైన నిబంధనల ప్రకారం వారిపై బైండోవర్ చర్యలు చేపట్టారు.
వినాయక నిమజ్జనోత్సవాల సందర్భంగా గొడవలు, ఘర్షణలు, అల్లర్లు, ఇతర అవాంఛనీయ ఘటనలు చోటుచేసుకోకుండా పోలీసులు ప్రత్యేక నిఘా ఏర్పాటు చేశారు. నిమజ్జన మార్గాలు, ప్రధాన కూడళ్లు, సున్నిత ప్రాంతాలు, రద్దీ ప్రదేశాల్లో భారీ బందోబస్తు ఏర్పాటు చేసి, నిరంతరం పర్యవేక్షిస్తున్నారు. నిమజ్జన కార్యక్రమంలో పాల్గొనే భక్తులు, ఉత్సవ కమిటీ సభ్యులు శాంతియుతంగా, క్రమశిక్షణతో వ్యవహరించాలని పోలీసులు సూచించారు. శాంతిభద్రతలకు విఘాతం కలిగించే చర్యలకు పాల్పడితే చట్టప్రకారం కఠిన చర్యలు తీసుకుంటామని హెచ్చరించారు.
ప్రజల భద్రత, శాంతిభద్రతల పరిరక్షణకు పోలీస్ శాఖ అన్ని ముందస్తు చర్యలు చేపట్టిందని, నిమజ్జనోత్సవాలను ప్రశాంతంగా నిర్వహించేందుకు ప్రజలు పోలీసులకు సహకరించాలని పోలీస్ కమిషనర్ పి. సాయి చైతన్య కోరారు. నిజామాబాద్ డివిజన్: 280 మంది ఆర్మూర్ డివిజన్: 175 మంది బోధన్ డివిజన్: 117 మంది మొత్తం: 572 మంది