సమావేశమవుతున్నాయా?
ఉత్తరప్రదేశ్లో రాబోయే అసెంబ్లీ ఎన్నికల నేపథ్యంలో భారతీయ జనతా పార్టీ (బీజేపీ) నేతలకు, కార్యకర్తలకు కేంద్ర హోంమంత్రి అమిత్ షా కీలక సూచనలు చేశారు. పార్టీలో నెలకొన్న అంతర్గత విభేదాలు, అసంతృప్తులను పక్కనపెట్టి ఐక్యంగా పనిచేయాలని ఆయన పిలుపునిచ్చారు. లక్నోలో జరిగిన రాష్ట్ర కార్యవర్గ సమావేశంలో ఈ వ్యాఖ్యలు చేశారు.
వచ్చే ఏడాది జరగనున్న అసెంబ్లీ ఎన్నికలకు బీజేపీ ఇప్పటి నుంచే సన్నద్ధమవుతోంది. ఈ నేపథ్యంలో పార్టీ నేతలు, కార్యకర్తల మధ్య ఉన్న విభేదాలు, అసంతృప్తులను పక్కనపెట్టి ఐక్యంగా పనిచేయాలని కేంద్ర హోంమంత్రి అమిత్ షా పిలుపునిచ్చారు. లక్నోలో జరిగిన బీజేపీ రాష్ట్ర కార్యవర్గ సమావేశంలో ఆయన మాట్లాడుతూ.. మనసులో ఉన్న నిరాశ, అసంతృప్తిని ఇక్కడి నుంచి వెళ్లేటప్పుడు గోమతి నదిలో వదిలేసి వెళ్లాలని వ్యాఖ్యానించారు. 2027 ఎన్నికల్లో పార్టీ విజయం కోసం ఓట్ల లెక్కింపు పూర్తయ్యే వరకు సమష్టిగా పనిచేయాలని సూచించారు.
కార్యకర్తల్లో అసంతృప్తి
ఉత్తరప్రదేశ్లో కొంతకాలంగా పార్టీ కార్యకర్తలు, స్థానిక నాయకుల్లో అసంతృప్తి ఉన్నట్లు బీజేపీ అంతర్గత సమీక్షల్లో వెల్లడైనట్లు వార్తలు వచ్చాయి. తమకు తగిన గుర్తింపు ఇవ్వడం లేదని, పార్టీ వ్యవహారాల్లో తమ అభిప్రాయాలకు ప్రాధాన్యం దక్కడం లేదని కొందరు నాయకులు ఫిర్యాదు చేసినట్లు సమాచారం. ఇతర పార్టీల నుంచి వచ్చిన వారికి టికెట్లు, మంత్రి పదవులు ఇవ్వడాన్ని కొంతమంది అంగీకరిస్తున్నప్పటికీ.. పార్టీ సంస్థాగత పదవుల్లోనూ వారికే ప్రాధాన్యం ఇవ్వడం పాత కార్యకర్తలకు ఇబ్బందిగా మారుతోందని అభిప్రాయాలు వ్యక్తమైనట్లు కథనాలు పేర్కొన్నాయి.
ఈ పరిస్థితుల్లో అమిత్ షా పార్టీ నేతలకు ఐక్యత సందేశం ఇచ్చారు. వ్యక్తిగత పదవులు, హోదాల కంటే పార్టీ లక్ష్యమే ముఖ్యమని స్పష్టం చేశారు. ఎవరికైనా ఆశించిన పదవి రాకపోవచ్చు, అనుకున్న బాధ్యతలు దక్కకపోవచ్చు. అయినప్పటికీ పార్టీ నిర్ణయాలకు కట్టుబడి పనిచేయాలని సూచించారు.
అద్వానీ మాటలను గుర్తుచేసిన యోగి
ఈ సమావేశంలో ఉత్తరప్రదేశ్ ముఖ్యమంత్రి యోగి ఆదిత్యనాథ్ మాజీ ఉప ప్రధాని ఎల్కే అద్వానీ చెప్పిన మాటలను ప్రస్తావించారు. రాజకీయ ప్రాధాన్యతలు కాలానుగుణంగా మారవచ్చని, కానీ పార్టీ విలువలు, ఆదర్శాలు, సిద్ధాంతాలు ఎప్పటికీ మారకూడదని అద్వానీ తరచూ చెప్పేవారని గుర్తుచేశారు. వ్యక్తిగత గౌరవం, అవమానాలను పట్టించుకోకుండా పార్టీ సిద్ధాంతాల కోసం కార్యకర్తలు పనిచేయాలని యోగి పేర్కొన్నారు.
బూత్ స్థాయి బలోపేతం
బీజేపీ ఉత్తరప్రదేశ్ అధ్యక్షుడు పంకజ్ చౌధరీ కూడా కార్యకర్తలకు పలు సూచనలు చేశారు. ప్రతి పోలింగ్ బూత్లో పార్టీ కార్యకలాపాలు చురుగ్గా సాగుతున్నాయా, బూత్ కమిటీలు క్రమం తప్పకుండా సమావేశమవుతున్నాయా, మండల, జిల్లా స్థాయి నాయకులు ప్రజలకు అందుబాటులో ఉంటున్నారా అనే అంశాలపై దృష్టి పెట్టాలని కోరారు.
ఎంపీలు, ఎమ్మెల్యేలు, ఎమ్మెల్సీలు పార్టీ కార్యకర్తలతో నిరంతరం సంప్రదింపులు కొనసాగించాలని సూచించారు. నాయకులు తమ అభిప్రాయాలు చెప్పడంతో పాటు కార్యకర్తల సమస్యలు, సూచనలను కూడా వినాలని అన్నారు. పార్టీకి నిజమైన బలం కార్యకర్తలేనని, కష్టకాలంలో పార్టీకి అండగా నిలిచిన వారికి గుర్తింపు, గౌరవం ఇవ్వడం ముఖ్యమని పేర్కొన్నారు.
