రిమ్స్ అగ్నిప్రమాదం ప్రభుత్వ నిర్లక్ష్యమే: ఎమ్మెల్యే అనిల్ జాదవ్

రిమ్స్ ఆసుపత్రిలో సోమవారం రాత్రి జరిగిన అగ్నిప్రమాద ఘటనలో బాధితులను బోథ్ ఎమ్మెల్యే అనిల్ జాదవ్, మాజీ మంత్రి జోగు రామన్న పరామర్శించారు. ఆసుపత్రిని సందర్శించిన ఎమ్మెల్యే అనిల్ జాదవ్ చికిత్స పొందుతున్న చిన్నారులు, వారి తల్లిదండ్రులను కలిసి ఘటన వివరాలను అడిగి తెలుసుకున్నారు. అగ్నిప్రమాదంలో ఇచ్చోడకు చెందిన శిశువు మృతి చెందడం పట్ల ఎమ్మెల్యే తీవ్ర విచారం వ్యక్తం చేసి ప్రగాఢ సానుభూతిని తెలిపారు.

ప్రభుత్వ నిర్లక్ష్యమే కారణం

ఈ సందర్భంగా ఎమ్మెల్యే అనిల్ జాదవ్ మాట్లాడుతూ.. జిల్లా ప్రజలు భరోసాతో రిమ్స్ ఆసుపత్రికి వస్తారని, కానీ ప్రాణాలు కాపాడాల్సిన ఆసుపత్రిలోనే ప్రాణాలు పోతున్నాయని అన్నారు. ప్రభుత్వ నిర్లక్ష్యంతోనే చిన్నారుల ప్రాణాలు పోయాయని అన్నారు. మూడేళ్లు గడిచినా రిమ్స్ ఆసుపత్రిని కనీసం మంత్రులు, అధికారులు సందర్శించకపోవడం సిగ్గు చేటన్నారు. రిమ్స్ ఆసుపత్రిలో కనీస సౌకర్యాలు కల్పించలేకపోతున్న ప్రభుత్వం తక్షణమే బాధితులకు క్షమాపణ చెప్పాలని బీఆర్ఎస్ పార్టీ తరపున డిమాండ్ చేశారు.

మెరుగైన వైద్యం అందించాలి

ప్రైవేటు ఆసుపత్రుల్లో చికిత్స పొందుతున్న చిన్నారులను ఎమ్మెల్యే అనిల్ జాదవ్, జోగు రామన్న పరిశీలించారు. చిన్నారులకు మెరుగైన వైద్యం అందించాలని, దానికి ప్రభుత్వమే పూర్తి బాధ్యత వహించాలని సూచించారు. బాధితుల ఆరోగ్య పరిస్థితిపై ఎప్పటికప్పుడు పర్యవేక్షణ చేయాలని సూచించారు.

సమగ్ర విచారణ, చర్యలు డిమాండ్

ఈ ఘటనపై సమగ్ర విచారణ జరిపి, బాధ్యతారాహిత్యంగా వ్యవహరించిన అధికారులు, సిబ్బందిపై తక్షణమే చర్యలు తీసుకోవాలని డిమాండ్ చేశారు. మరణించిన చిన్నారులకు ఆర్థిక సహాయాన్ని అందించి కుటుంబాన్ని ఆదుకోవాలని డిమాండ్ చేశారు. గాయపడి చికిత్స పొందుతున్న చిన్నారుల పూర్తి బాధ్యత ప్రభుత్వమే వహించాలని డిమాండ్ చేశారు.

భవిష్యత్తులో ఇలాంటి ప్రమాదాలు పునరావృతం కాకుండా ఆసుపత్రుల్లో భద్రతా చర్యలను మరింత పటిష్టం చేయాల్సిన అవసరం ఉందని ఎమ్మెల్యే అనిల్ జాదవ్ పేర్కొన్నారు.

బాధిత కుటుంబాలకు అవసరమైన సహాయ సహకారాలు అందించేందుకు తన వంతు కృషి చేస్తానని ఎమ్మెల్యే హామీ ఇచ్చారు.