మాజీ ఎమ్మెల్యే, ప్రముఖ నటి, రాజకీయ నాయకురాలు రోజా తన సుదీర్ఘ సినీ ప్రస్థానంపై ఇటీవల ఓ ఇంటర్వ్యూలో అనేక ఆసక్తికర విషయాలను పంచుకున్నారు. 90వ దశకంలో హీరోయిన్గా తన కెరీర్ ఉన్నత దశలో ఉన్నప్పుడు ఎదురైన సవాళ్లు, సహనటులతో తన అనుబంధం, సినీ జీవితంలోని ప్రత్యేక మైలురాళ్లను ఆమె వివరించారు.
ఆ సమయంలో నటి మీనాతో తనకు గట్టి పోటీ ఉండేదని రోజా గుర్తుచేసుకున్నారు. తెలుగు, తమిళం, కన్నడ భాషల్లో తామిద్దరే ముఖ్య నటీమణులుగా వెలుగొందామని, ఆన్స్క్రీన్పై పోటీ పడుతున్నా, ఆఫ్-స్క్రీన్లో మంచి స్నేహితులమని తెలిపారు. రంభ వంటివారు తమకు జూనియర్స్ అని, రమ్యకృష్ణ, నగ్మా వంటివారు సీనియర్స్ అని పేర్కొన్నారు. చిరంజీవితో తనకు అద్భుతమైన అనుబంధం ఉందని రోజా వెల్లడించారు. బయట గుర్తుపట్టేస్తారని, చిరంజీవి, ఆయన భార్య సురేఖ, తాను కలిసి మారువేషాల్లో ఖైరతాబాద్లోని ఓ ప్రసిద్ధ బిర్యానీ సెంటర్కు వెళ్లి బిర్యానీ తినేవారమని గుర్తు చేసుకున్నారు. ముఠామేస్త్రి చిత్రంలో మామ మామ పాట చిత్రీకరణ సమయంలో చిరంజీవి తన నటనను, డాన్స్ను ప్రశంసించారని తెలిపారు. సురేఖ కూడా తన డాన్స్ అంటే ఇష్టమని, చిరంజీవికి సమానంగా బాగా చేస్తావని మెచ్చుకునేవారని రోజా చెప్పారు. బాలకృష్ణతో చాలా చిత్రాలు చేశానని, చిరంజీవితో మూడు చిత్రాలు చేశానని తెలిపారు. సహనటులతో ఎప్పుడూ ఎలాంటి విభేదాలు రాలేదని, అందరితో స్నేహపూర్వకంగా ఉండేదాన్ని అని అన్నారు. అసూయకు తావు లేకుండా, ఉన్నంతవరకు సంతోషంగా నవ్వుతూ ఉంటానని, అదే తన రహస్యమని రోజా వివరించారు. వెంకటేష్తో తనకు గ్యాప్ వచ్చిందనే ప్రచారంపై రోజా స్పష్టత ఇచ్చారు. తాను వెంకటేష్తో ఒకే ఒక్క చిత్రం చేశానని, అది వ్యక్తిగత కారణం కాదని చెప్పారు. తమిళంలో విజయకాంత్ నటించిన ఒక చిత్రం హిట్ అయిందని, దానిని తెలుగులో చామంతి పేరుతో రీమేక్ చేయాలనుకున్నారని తెలిపారు. మొదట దర్శకుడు సెల్వతో ఒక పూజా కార్యక్రమం జరిపిన తర్వాత, సెల్వకు తెలియకుండానే అదే షెడ్యూల్, కాస్టింగ్తో (వెంకటేష్, విజయశాంతి) ఆ రీమేక్ను తెరకెక్కించడానికి ప్రయత్నించారని, దీనివల్ల సెల్వ మనస్తాపం చెందారని రోజా వెల్లడించారు. ఇది సెల్వ, నిర్మాత నర్సారెడ్డి, వెంకటేష్లకు సంబంధించిన విషయమని, తనతో వెంకటేష్కు ఎలాంటి వ్యక్తిగత విభేదాలు లేవని స్పష్టం చేశారు.
