వర్షానికి తడిసిన ధాన్యం కొనుగోలు వెంటనే ప్రారంభించాలి: ఉప్పు కృష్ణ

వర్షం కారణంగా ధాన్యం కొనుగోలు కేంద్రాల వద్ద వడ్లు కోసిన రైతులు నానా అవస్థలు పడుతున్నారని, సరైన సౌకర్యాలు లేక, రైతులకు టార్పాలిన్లు అందించకపోవడంతో అనుకోకుండా రాత్రి కురిసిన వర్షానికి చాలామంది రైతుల ధాన్యం నీట మునిగిందని ఉప్పు కృష్ణ తెలిపారు. నీట మునిగిన ధాన్యాన్ని కూడా తేమ శాతంతో సంబంధం లేకుండా వెంటనే కొనుగోలు ప్రక్రియను పూర్తి చేయాలని ఆయన డిమాండ్ చేశారు. ధాన్యం కొనుగోలు కేంద్రాలలో సరైన సౌకర్యాలు కల్పించాలని, ప్రతి రైతుకు టార్పాలిన్లు అందించాలని ఆయన ప్రభుత్వానికి సూచించారు.

కరెంటు సరఫరా సరిగ్గా లేకపోవడం, పంటలు ఎండిపోవడం, ఎరువులు, పురుగుమందుల ధరలు పెరగడం, పెట్టుబడులు పెరగడంతో రైతులు తీవ్ర ఇబ్బందులు ఎదుర్కొంటున్నారని ఉప్పు కృష్ణ పేర్కొన్నారు. వీటన్నింటిని దృష్టిలో ఉంచుకొని తక్షణమే కొనుగోలు ప్రక్రియను పూర్తిచేసి, అందుకు సంబంధించిన డబ్బులను వారం రోజులలోపు రైతులకు అందించేలా రాష్ట్ర ప్రభుత్వం చొరవ చూపాలని ఆయన డిమాండ్ చేశారు.