గాంధారి, 9 November
కామారెడ్డి జిల్లా మండలంలోని గుడిమెట్ శివారులో ఆర్టీసీ బస్సును ఓవర్టేక్ చేయబోయిన కారు ఢీకొని, రెండు వాహనాలు పంట పొలాల్లోకి దూసుకెళ్లాయి.
కామారెడ్డి జిల్లా మండలంలోని గుడిమెట్ శివారులో సోమవారం ఉదయం ఘోర రోడ్డు ప్రమాదం తప్పింది. కామారెడ్డి నుండి బాన్సువాడకు 16 మంది ప్రయాణికులతో వెళ్తున్న ఆర్టీసీ బస్సును వెనుక నుంచి వచ్చిన కారు ఓవర్టేక్ చేయబోయింది. ఈ క్రమంలో కారు బస్సుకు స్వల్పంగా తగలడంతో రెండు వాహనాలు అదుపుతప్పి రోడ్డు పక్కన ఉన్న పంట పొలాల్లోకి దూసుకెళ్లాయి. ప్రమాదంలో ఆర్టీసీ బస్సులో ప్రయాణిస్తున్న ఇద్దరికి స్వల్ప గాయాలయ్యాయి. వారిని చికిత్స నిమిత్తం ప్రభుత్వ ఆసుపత్రికి తరలించారు. ప్రమాదం జరిగిన వెంటనే ఆర్టీసీ డ్రైవర్ బి రాజు అప్రమత్తంగా వ్యవహరించడంతో పెను ప్రమాదం తప్పినట్లు తెలుస్తోంది.
ప్రమాద సమాచారం అందుకున్న కామారెడ్డి ఆర్టీసీ డిఎం సంఘటనా స్థలానికి చేరుకున్నారు. ప్రమాదానికి గల కారణాలను అడిగి తెలుసుకున్నారు. కండక్టర్, ప్రయాణికుల ఫోన్ నంబర్లు తీసుకున్నారు. ప్రమాదం జరిగిన తీరుపై ఆరా తీశారు. ప్రమాదానికి ఆర్టీసీ బస్సు డ్రైవర్ బి రాజు కారణం కాదని, బస్సులో ప్రయాణిస్తున్న ప్రయాణికులు తెలిపారు. 16 మంది ప్రయాణికులలో ఇద్దరికి స్వల్ప గాయాలైనట్లు వారు తెలిపారు.
